Doutora en Historia pola Universidade de Santiago de Compostela, coa tese “Una arqueología de género para el estudio de la sociedad galaica entre los siglos IV–VI d.C.”, cualificada con sobresaliente cum laude, proposta a premio extraordinario e galardoada co segundo premio ÍCARUS 2024 da USC á mellor tese doutoral en Humanidades. Actualmente é investigadora posdoutoral da Xunta de Galicia na Universidade de Santiago de Compostela-CISPAC, onde desenvolve o proxecto COIDARQ: Coidados, materialidades e espazos. Unha análise arqueolóxica das sociedades rurais altomedievais desde a perspectiva de xénero.

A súa investigación céntrase na arqueoloxía de xénero, a arqueoloxía doméstica, as actividades de mantemento e os coidados nas sociedades rurais entre o final do Imperio romano e a Alta Idade Media, especialmente no noroeste peninsular. Actualmente realiza unha estadía de investigación no Lab2PT da Universidade do Minho, dentro da Unidade de Arqueologia, onde desenvolve liñas de traballo vinculadas á arqueoloxía rural, o patrimonio, a memoria e a construción social das paisaxes.

Foi investigadora en diversos proxectos nacionais e internacionais, entre eles ANTIGONE, INPACT, ARPAMED, ECOLOC. Como arqueóloga dirixiu intervencións arqueolóxicas en xacementos como O Castelo de Valencia do Sil e San Vicente de Trigás, onde combina a investigación científica coa formación, a transferencia social e a arqueoloxía en comunidade. As súas principais liñas de investigación son: arqueoloxía de xénero; espazos domésticos e actividades de mantemento; sociedades rurais tardorromanas e altomedievais; coidados, materialidade e vida cotiá; patrimonio, memoria e socialización arqueolóxica.